ሴቶችን ማስተማር ቤተሰብን፣ ማህበረሰብን፣ ብሎም ሀገርን ማስተማር ነው!

////////////////////////////////////////////////////////////////////////////

ልማት ለህብረተሰብ በህብረተሰቡ የሚሰራ የህልውና እና የእድገት ጉዳይ በመሆኑ ሁሉን አቀፍ ልማት ለማስመዝገብ የሁሉም ህብረተሰብ ተሳትፎ ወሳኝ ነው፡፡ ከዚህ መረዳት የሚቻለው የህብረተሰቡን ግማሽና ከዚያ በላይ ቁጥር የሚሸፍኑ ሴቶች ያልተሳተፉበት እና ተጠቃሚ የማይሆኑበት ማናቸውም አይነት የልማት (ማህበራዊ፣ ኢኮኖሚያዊና ፖለቲካዊ) እንቅስቃሴዎች በግማሽ ጉልበት፣ በግማሽ ዕውቀት፣ በግማሸ ጥረት ላይ የሚመሰረት በመሆኑ የሚጠበቀውን ያህል ውጤት ለማግኘት አስቸጋሪ በመሆኑ ሴቶችን ማሳተፍ የልማት፣የእድገትና የህልውና ጉዳይ መሆኑን ነው፡፡

////////////////////////////////////////////////////////////////////////////

ትምህርት ደግሞ የልማት፣ የእድገትና የስልጣኔ ቁልፍ መሳሪያ በመሆኑ ሴቶችን ማስተማር፣የሴቶችን የትምህርት ተሳትፎ ማሳደግ አማራጭ የሌለው ተግባር ነው ማለት ነው፡፡

የሴቶች በተሟላ መልኩ ትምህርት ማግኘት ለሴቶች ብቻ ሳይሆን ለማህበረሰቡ አልፎም ለሃገሪቱ እድገትና ብልፅግና መሰረት ነው። ትምህርት ለሴቶች የስራ እድል፣ የገቢ ምንጭ፣ የጤና እንክብካቤ ጥራትና ጥሩ የሕዝብ ግንኙነት እድል የማግኘት ዕድላቸውን ይጨምራል፣ ልጆቻቸውን በማገዝ እና በመልካም ስነምግባር አንጾ በማሳደግ ለቤተሰብ ብልፅግና መሰረትነትና ለማኅበረሰባቸው ደህንነት የመሆን እድላቸውን ያሰፋል፡፡ የጾታ ማዕቀፍን ለማስተካከል፣ ለሴቶች ተጠቃሚነት የሚጠቅሙ ፖሊሲዎችንና ሕጎችን ለማውጣት እንዲሁም ለሴቶች የሚደረገውን ድጋፍ ለማሳደግ እና በስርዓተ ጾታ ላይ ያለውን የተዛባ አመለካከት ለማስተካከል ከፍተኛ አስተዋፅኦ እንዲኖራቸው ያስችላል፡፡

////////////////////////////////////////////////////////////////////////////

በተደጋጋሚ የሀገራችን ጠቅላይ ሚኒስትር አብይ አህመድ(ዶር.) እንደሚናገሩት በተጨባጭም ከሚታየው እውነታ እንደምንረዳው ሴቶች ከውድድር ይልቅ ትብብርን ፣ ከግልፍተኝነት ይልቅ ሰከን ማለትን የሚያስቀድሙ፣ እንደ ሀገር ያለብንን የስክነት፣ የማስተዋል፣ አርቆ የመመልከት፣ የግልፍተኝነት፣ የጸበኝነት፣ የእርቅ፣ የሰላም መንፈስ ጉድለት የሚሞሉ ናቸው፡፡ ሴቶች በኢትዮጵያ ግማሽ ቁጥር ያላቸው ብቻ ሳይኾኑ በሁሉም ሥራዎች ያላቸው ሚና እጅግ ከፍተኛ በመሆኑ ሴቶችን ማሰብ፣ ማነጽ፣ ማስተማር፣ እድል መስጠት ካልቻልን እንደ ሀገር ለመለወጥ ያለን ሕልምም ሙሉ አይኾንም፡፡ ስለዚህ በተፈጥሮ የተቸሩትን መልካም እሴቶቻቸው በትምህርት በማዳበር ለሀገር እድገትና ብልጽግና ማዋል ይገባል፡፡

////////////////////////////////////////////////////////////////////////////

መሰረታዊ ምክንያቱ ድህነት ቢሆንም፣ የፆታ እኩልነት አለመኖር፣ በየጊዜው ዓይነታቸውን እየቀያየሩ የሚፈጸሙ ጥቃቶች መበራከት፣ ያለ እድሜ ጋብቻ ፣ ከቅርብ ግዜ ወዲህ በብዛት የሚስተዋለው ህገወጥ ስደት እና ግጭት/ጦርነት፣ የተዛባ የስርዓተ ጾታ አስተሳሰብ ምክንያት ማኅበረሰቡ በሴቶች ትምህርት ዙሪያ ያለው ግንዛቤ አናሳ መሆኑ፣ ከትምህርት ተደራሽነትና ትምህርት ቤቶችን ለሴቶች ምቹ ካለማድረግ ችግር፣ በሴቶች ትምህርት ዙሪያ ያሉ ፖሊሲዎችና መመርያዎች በብቃት አለመተግበራቸው ፣የሴቶችን መብት የኢኮኖሚ እና አገር የመገንባት ጉዳይ አድርጎ ካለማየት ችግሮች ጋር ተዳምረው ለሴቶች ከትምህርት ገበታ መራቅ ዋና ምቹ መደላድል ሆነዋል፡፡

////////////////////////////////////////////////////////////////////////////

እነዚህን ተግዳሮቶችን የመዋጋት የመንግስት ሃላፊነት ተደርገው መወሰድ የለባቸውም። ሴቶችን ማስተማር አገራችን ለገጠሟት በርካታ ችግሮች መፍትሄ መሆኑን፣ ሴቶች ቤተሰብን ለማስተዳደር ትልቁን ሃላፊነት የሚወስዱ መሆኑን፣ ምርትና ምርታማነትን ለማሳደግ ረጅም ጊዜ የመስራትና ካገኙት ላይ የመቆጠብ ባህላቸው በጣም የተሻለ መሆኑን አጠቃላይ ከቤተሰብ ጀምሮ ለሀገር እድገትና ብልጽግና ወሳኝ መሆኑን እና ሴቶችን ማስተማር ቤተሰብን፣ ማህበረሰብን፣ ብሎም ሀገርን ማስተማር መሆኑን በመገንዘብ ሁሉም የህብረተሰብ ክፍል መንግስት ሴቶችን ለማብቃት የሚያደርገውን እንቅስቃሴ የማገዝ ሃላፊነት አለበት። ለዚህ እቅድ ስኬት ሴቶችም የአንበሳውን ድርሻ ሊወጡ ይገባል።